தி டே ஆஃப் தி ஜேக்கல்..

Gozzi எனப்பெயரிட்ட கதவை இளைஞன் தட்ட, கோட் சூட், டையுடன் 70 வயது மதிக்கத்தக்க முதியவர் ஒருவர் கதவை மெல்ல திறந்து,

‘உள்ளாற வாங்க’

‘தேங்க்ஸ்.. இந்த வேலய உங்களால செய்ய முடியுமா?’

‘தாராளமா’

‘துப்பாக்கி ரொம்ப லைட்டா இருக்கனும். இப்ப இருக்கற துப்பாக்கியையே கொஞ்சம் மாத்தி சின்னதா குழல் வைக்கனும்’

‘அடப்பாவமே! சின்னதா குழலா!’

‘ஆமா.. அப்பறம், சத்தம் வராம இருக்க சைலன்ஸர், டெலஸ்கோபிக் பார்வை இதெல்லாம் வைக்கனும்’

‘என்ன ரேஞ்சுல இருந்து சுடப்போறதா உத்தேசம்?’

‘நாணூறு அடி தாண்டாது’

‘பயபுள்ள அசைவானா அல்லது அங்ஙனயே இருப்பானா?’

‘அப்பிடியே நிப்பான்’

‘எங்க சுடப்போற?.. மண்டயா தொண்டயா?’

‘மண்ட’

‘ரெண்டாவது தடவ சுடப்போறியா (மொத குறி தப்பிச்சுன்னா)?’

‘ரெண்டாவது சான்ஸ் எடுப்பேன். ஆனா சைலன்சர் முக்கியம் நான் எஸ் ஆகறதுக்கு’

‘அப்ப புல்லட்டும் வெடிச்சி சிதறனும். அதுமாதிரி தோட்டா தயார் பண்றேன், கிளிசரினா பாதரசமா?’

‘பாதரசம் தான்’

‘இன்னொரு வாய் சாராயம் ஊத்திக்கிறயா? இது கேம்பரி.. இத்தாலி சரக்கு’

‘போதும்.. பொறவு பாக்கலாம்’

‘நீ ரொம்ப ஜாக்கிரதையா அங்க போயி ஒளியனும். ஊந்துப்பாக்கி வெறகு கட்டை மாதிரி பெருசா போலீஸ்காரனுங்க கண்ல பட்டுச்சுன்னா அன்னிக்கே உனக்கு பால் தான்’

‘அதுக்கு தான் நீங்க துப்பாக்கிய இது மாதிரி சின்னதா செய்யனும். சின்னதா அலுமினிய குழாய்.. மேல்பாகம் தோட்டாக்களை உந்தித்தள்ள உள்பக்கமா ராடு (Strut)…கீழ இருந்து தோட்டாக்கள உள்ளே தள்ள மூடித்தொறக்கறா மாதிரி ஓட்டை (Breech).. தோள்ல நல்லா ஒக்கார்ர மாதிரி ஷோல்டர் ரெஸ்ட்.. முக்கியமா சத்தம் வராம இருக்க சைலன்ஸரும், டெலஸ்கோபிக் சைட்டும் ரொம்ப முக்கியம்’

‘பெருசா ஒன்னுமில்ல.. எனக்கு இது ஜுஜூபி மேட்டர்’

‘ரெண்டு வாரத்துல ரெடியாயிடுமா?’

‘வர்ற் ஆகஸ்ட் பதிமூணாந்தேதி என்னய வந்து பாரு.. துப்பாக்கிய நீ சரி பார்த்துடலாம்’

‘சரி.. அமௌன்ட்டு எவ்ளோ ஆகும்?’

‘தோராயமா ஆயிரம் பவுண்டு.. இது மாதிரி நாகாசு வேலைக்கி. முன்ன பின்ன எரநூறு முண்ணூறு ஜாஸ்தியாகலாம்’

‘சரி.. பாதி பணம் இப்ப, மீதிய வேல முடிஞ்சாவுட்டு குடுத்துர்றேன்’

ஆகஸ்ட் 13…

‘ரெடியாயிடுச்சு.. அல்லாத்தையும் இந்த சூட்கேஸ்ல போட்ருக்கேன்’

‘சூட்கேஸ் வேணாம். துப்பாக்கிக்குழலை அலுமினியத்துல தானே செய்யச்சொன்னேன்’

‘சுடற வேகத்துல அலுமினியம் டிஷ்யூ பேப்பர் மாதிரி வளைஞ்சிடும். மச்சமிருந்தா பயபுள்ள தப்பிச்சுக்குவான். இரும்புக்குழாய் உயிருக்கு உத்தரவாதம்’

‘துப்பாக்கிய எப்பிடி நான் சரிபாக்கறது?’

‘நீ மோன்ட்டிமோரோ காட்டுப்பக்கம் போய் சுட்டுப்பாக்கனும். வெள்ளன போயிட்டு இருட்றதுக்குள்ளார வந்துடலாம்’

‘சரி.. ஸ்ட்ரட் எங்க?’

‘இதோ’

‘சைலன்சரும் ஸ்னைப்பரும்?’

‘இதோ’

‘ட்ரிக்கர்?’

‘இதோ’

‘எல்லாம் சரியா இருக்கு. டக்கரா பண்ணியிருக்கீங்க’

‘நீ ப்ராக்டீஸ் பண்றதுக்கு ரெடி பண்ணியிருக்கேன், இந்தா இந்த ஆறு தோட்டாக்கள.. சின்னதா நீட்டமா காராச்சேவு மாதிரி இருக்கு பாரு’

‘நல்லாருக்கு, ஒண்ணு போதும்’

சம்பவத்தன்று அதிபருக்கு இராணுவ அணிவகுப்பு, இன்னபிற மரியாதை சடங்குகள் ஒவ்வொன்றாக நடந்துகொண்டிருக்க, இளைஞன் எதிர்திசையில் ஒரு கட்டிடத்தினுள்ளே ஒளிந்துகொண்டு ஜன்னல் இடுக்கு வழியே துப்பாக்கிக்குழலைச் சொருகி கண்களை இடுக்கி, குறி பார்த்துக்கொண்டிருக்க, தொப்பியணிந்த அதிபர் தன் எதிரே இருந்த வீரன் நெஞ்சில் பதக்கத்தை குத்தும்போது, அவரது நெற்றிக்கு பக்கவாட்டுப் பக்கம் குறுக்கிழையை (crosshair) நகர்த்தி, சரியாக குறி வைத்து ட்ரிக்கரை அழுத்த, சத்தமில்லா துப்பாக்கியிலிருத்து தோட்டா சீறிப்பாய்த்து அவரது தலையை நெருங்கும் ஒரு நொடிக்குள்… பயபுள்ள பவ்யமாக குனிந்து வீரனுக்கு முத்தமிட, தோட்டா அவரது பின்மண்டையை மயிரிழையில் உரசாமல் தாண்டி, தரையில் டப் என சன்னமாக சத்தத்துடன் தெரித்து விழுந்தது.

71இல் ஃப்ரெட்ரீக் ஃபோர்சித் எழுதிய ‘தி டே ஆஃப் தி ஜேக்கல்’ நாவல் அடுத்த இரண்டு வருடங்களில் திரைப்படமாக வந்து பட்டையை கிளப்பியது. படத்தில் சட்ட விரோதமாக அந்த துப்பாக்கியை தயாரிக்கும் Gunsmith களவாணி முதியவர் வரும் காட்சி தான் மேற்படி பதிவு. இன்றும் இப்படத்தை ரசித்துப் பார்க்கலாம். அவ்வளவு நுணுக்கமான விபரங்களுடன் எழுதிய நாவல் வரிகள் படத்திலும் அப்படியே!

சற்று முன் படத்தின் இந்த காட்சியை பார்த்தபடியே, நகைச்சுவைக்காக எளிய தமிழில் பதிவு எழுதும்பொருட்டு செய்த முயற்சி இது!